هابي فالنتاين

بمناسبة حلول ذكرى عيد الحب فالنتاين، أحب أهني الكل وأتمنى من الحكومة والمجلس بما إنهم تعرفوا على بعض، إن نواب المجلس العسرين يقبلون ابتسامة الحكومة ويدورون حواليها، وكل واحد يقول لها كلمة غزل من صوبه، وبعدها تاخذ رقم اللي تبيه منهم يصير زوج المستقبل، وتبتدي تواعده إلى أن يقررون يعلنون علاقتهم على الملأ بدون ما أحد يدري طبعا، ويبتدون يقزون مع بعض على الدائري السادس مع حرصه على أن يدبل باقات الجامات على يمين ويسار السيارة حفاظا على الخصوصية.

وبعدها تخف الباقات تدريجيا إلى أن يصلون عقب شهر من المكالمات الظهرية والمسائية وقبل الصباحية التي تحتوي عبارات حبيبي قوم وراك دوام (لأنه وراه امتحان تأمين بالمعهد التجاري مو اجتماع صناديق الأسواق الناشئة بالهيئة العامة للاستثمار)، وبعدها راح يكون تحدي أكتيفيا أي اتجاه بتروح العلاقة؟ الطوفة وإلا السقف؟

وبحكم الخبرة لما تتصنف العلاقة على إنها علاقة بين المايتاين محد عارف لها سقف من طوفة، يقرر الحبيب ياخذ المبادرة ويدخل ساخن، فيروحون سينما السيارات مع بعض بدون باقات ويمدون السماعة وخرطوم التكييف، ويعلقونها ورا السايق مثل باجي العوايل على اعتبار إنهم عايلة مثلهم مثل غيرهم، وبعد يزيدون عليهم بطلب بوبكورنين واثنين هوت دوج ودايت سفن.

وبدون طوفة وسقف ما ينبني البيت، فيقرر الحبيب يقدم تنازل أكبر ويسوي أب قريد للعلاقة مع الحبيبة، وتنتقل المسألة من سوالف بسيارة إلى سوالف في باص عائلي كبير، وأنت وحظك يا يدعم الباص وينقلب أو يكمل ويوصل محطته.

لكن فجأة، وعقب كل هذا يقرر الحبيب إنه ما يحب الحبيبة وترجع عليه المسائل عايدي ويطلع جدامه استحقاق أكبر منه، ويكشف إنه لازم يرد الدب وباجي الصور وصندوق العدة، ولأنه تصرف بالدب وما عاد تحت إيده، تتحول القصة من حب بين طرفين إلى واحد أخذ دب ما يستحقه من وحدة حبته في يوم من الأيام وأهو ما يستاهل حتى دب.

وفي هذا الوقت يدخل واحد كحيان بس ساكب بالغلط محل ذهب يبي يدق تليفون لأن تليفونه انفصل فجأة، وفجأة بما إن الموضوع صار فجأة .. تصيده وحدة على الباب ويتعرجب وتقول له سلامتك يا بعد عمري وينحرج ويغمض عيونه من الفشلة وتنهدل بكلته على كتر ويشوح بشعره وإهي لا تزال تنتظر منه أي مؤشر على استمرار السالفة وإلا تاخذ مضعدها وتفل؟

هل تاخذ المضعد وتمشي وإلا تعطي بارقة أمل لواحد سكبة داخل محل ذهب يدور هدية حق رفيجته .. اللي أتمنى أن أكون أهي، لأن في حياتي محد دز لي بالفلانتاين شي في ذهب.

ولأن الأمور ليست كما تبدو عليه، ولأن الأبعاد الظاهرة بالمرآة غير حقيقية، يقرر النائب يدخل بالحكومة ويصير الوضع محلل، وتيبب الحجية العودة والدموع تخالط محياها، وتطلع رفيجة البنت بالمشهد وتقول حق رفيجتها ترى كانت عينه علي لما كنت يمج بالسيارة، بس لأن كانت حايشتني انفلونزا ما قدرت أرد عليه لما قال هلا بالحلوة .. ممكن انتعرف؟، لكن أنا روحي رياضية وعليج بالعافية بس حطي بالج منه، وتبتدي تحط العصي بالدواليب وتتهدد العلاقة بين الطرفين، ويقرر الوزير المحلل يزعل قبل الملجة، وتتعقد الحسبة وتدخل الحكومة بموعد الاستحقاق الدستوري ومحد يدري شيصير؟

وفجأة بمناسبة الفالنتاين، يدخلون الناس ثري سكستي ويلقون الحبيب والحبيبة قاعدين على طاولة وحدة وعليها وردة حمرة ويتبادلون كلمات الغزل، ويمثلون عليهم إنهم يحبون بعض فيمثلون عليهم الناس إنهم يتحلون عليهم، لين يعلنون تشكيل الحكومة أو يلعنون خيّر بعض.

.. وهابي فالنتاين أوووول

رجعنا لكم

شكلي برجع أكتب

تست

ألو ألو
تست تست
واحد ثنين ثلاثة

هلا فبراير

آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه ... ههههههههههاه .. إإإإإإإإإإإإإإإإإإإإإإإإإإإإإإإإإإإإييييييييييييييخهههههههه

صباح الخير، صار لي شهر ونص مختفي، عسى المانع خير، طبعا خير، وإذا مو خير شدعوة بتفرق، المهم، خل أتمغط وأشيك على الساتس .. المتابعين شطفوا 24 ألف، أعلى بوست خالي قوة خالي، اليوم 18 أمس 51 الشهر اللي طاف باكو وربع، الحين واحد قاعد يقرا بوست خالي قوة خالي، طبعا مو أنا لأنه مبين إنه بالكويت، اللهم اجعل كلامنا خفيف عليهم، ورجاء لا أحد يزعجه .. دشوا بهدوء وأقروا بهدوء وطلعوا بهدوء .. ولا تنسون تحطون موبايلاتكم سايلنت مثل مكتبة الجامعة، مواضيع البحث أكو أحد يدورني على قوقل كاتب فهد العسكر بلوجر وكاتبها بالجيم، وواحد يدور علي كاتب بنت البولندية، صج قصده مو شريف، والدشاشة من فريج سعود والفاهم واستكانة.

شقول شقول، إي بمناسبة هلا فبراير وإني مو موجود بالكويت أحب أقول لكم إني من حوالي عشر سنين وأنا من يبلش مهرجان هلا فبراير بكرنفال شارع سالم المبارك على أولي أوشه المطار، وما أرد الديرة إلا عقب ما تخلص آخر رشة فوم باحتفالات العيد الوطني.

السر في فبراير إنه أقصر شهر بالسنة، ولما تاخذه إجازة من الداوم الشؤون الإدارية يحسبونها لك 21 يوم، وبعدين لأن الناس بالصيف تسافر وبرمضان ما تشتغل، فيطلع فبراير أحلى شهر تاخذ فيه إجازة وما يروح من رصيدك ذاك الزود.

فمنذ عقد من الزمان وأنا هذا ولبي، تنطلق فعاليات هلا فبراير بكرنفال شارع سالم المبارك أوشه أنا من صوبي بكرنفالي على شارع المطار، بلش هلا فبراير وشه المطار ورد عقب الفوم، بلش هلا فبراير وشه المطار ورد عقب الفوم، بلش هلا فبراير وشه المطار ورد عقب الفوم، بلش فبراير وشه المطار ورد متى؟

عفية على الشطار

الحين المشكلة منعوا الفوم فضاع القياس واحتاست الحسبة، واحتمال إذا ماكو فوم هالسنة ما يخلص فبرايري ووارد جدا إنه ينمغط لي جولاي.

فبراير برة الكويت غير، وكل مرة أقول بمر السفارة الكويتية أحتفل مع السفير والدبلوماسيين بمناسبة الأعياد الوطنية، لكن يا يطلع لي شي أهم أو أكون ناسي بشتي مال الرسبشنات.

لحظة لحظة .. لا يكون صدقتوا إن عندي بشت حق الرسبشنات، طبعا آخر همي أروح رسبشن السفارة الكويتية، أنا الكويتيين بالكويت ما أشتهيهم هالدور أروح لهم لي عقر دارهم برة الكويت، مينون صاحي.

كل رسبشنات العالم الناس تهني وتسولف وتضحك وتحتفل وإحنا دبلوماسيينا يتناغزون: ما شفت البلوق الفلاني شكاتبين فيه، تهقى صفقة زين بتم، ما تدري ليش السوق نازل اليوم، قريت البلوق الفلانتاني شقايلين فيه عن الشيخ العلاني، يهدون الأوادم ويجابلون روحهم مع العلم بأنهم يداومون بنفس المكان كل يوم، ويسألون بعض كل يوم نفس الأسئلة: قريت شكاتبين الشاهد، شفت الدار شنو قايله، والأنكى اللي يسأل محد قرا الوسط؟ كل هالجرايد التافهة يتابعونها دبلوماسينا، فلكم توقع مستوى التقارير اللي توصل الخارجية.

أكو أحد يقرا جريدة الوسط، أظن حتى إدارة تحريرها ما يقرونها، وتالي ينقلب الرسبشن حش وإشاعات، دريت سفيرنا بيردونه ديوان السفارة يقولون الشيخ مو راضي عنه، طبعا الشيخ كلمة مفتوحة ما تدري من يقصدون فيها، من رئيس مجلس الوزراء وأنت نازل، وعقب السفير ينزلون على القنصل يقولك بينقلونه سفارتنا اليديدة مع ترقية، معلوم يرقونه دام الكويت تمشي وتفتح بهالسفارات أكيد بيصير نقص وملزوم يرقون وإلا شلون يعني نجنس دبلوماسيين من أفريقيا مثل منتخب قطر، عاد تخيل دبلوماسي كويتي اسمه كريستوفر وينادونه بالسفارة بو عبدالله، وينزلون لي المستشار، وعقب لأنهم ما يبون يحشون ببعض يدورون على الدبلوماسيين بالسفارات الثانية، إلا دريت إن سكرتيرنا الثالث (لاحظوا إنه سكرتيرنا مو سكرتير الكويت) اللي بسفارتنا (نفس الملاحظة السابقة) بالمنقطعة بيحطونه سفير وينقزونه على دفعته بالديرة اللي ما فيها كهربا، بالله أكو ديرة ما فيها كهربا، شلون يشحنون موبايلاتهم، بالطاقة الشمسية وإلا على الفحم؟

أما الأحلى حريم الدبلوماسيين، يا حش يا مخازز، شفي مرت السفير شلابسة اليوم ، نفنوفها اللي لبسته ذاك اليوم باستقبال الوزير أحسن، مع العلم بأن الكل لابسين دراريع وأثواب تقول رايحن عرس حريم وكل وحدة تتهدد على نزلة الميد الحين قبل بعد شوي، تالي يقلبون على حرم القنصل لأنها مكسينة ويشنعون فيها هذه الهيليقية اللي ما تعرف تلبس، عاد المسكينة عادة ما تكون كيوت وسمبل بس لأنها جامعية وراتبها أكثر منهم ما يحبونها وعادي يهلقون فيها، تالي ينتقل الحديث حق حريم الدبلوماسيين الأجانب والحضور، وبعدين يبدون يتذكرون ويتميلحون على بعض، أذكر لما كان ريلي في الديرة الفلانية بحفل الاستقبال مال العيد الوطني طاحت ترجية حرم الملحق العسكري قبل خمس سنين، طبعا كل هاللفة علشان تعطي معلومتين الأولى إن ترجية حرم الملحق طاحت والثانية إنها راحت ذيج الديرة، فترد عليها الثانية عاد تصدقين يقولون لما رد الكويت طلع تقاعد وتزوج عليها، والثانية قصدها من الإضافة الأخيرة معلومتين بعد الأولى إنها تعرف منو تقصد، والثانية إنها لين الحين متابعة أخبارها، ثم ينحرف مجرى الحديث إلى منو تزوج ومنو تطلق ويخلص الريسبشن ويدور كل دبلوماسي على مرته تالي يلقونهم باللوبي يسولفون، ها شلون الرسبشن وايد زين على الأقل يو مسؤولين كبار بالدولة، وتخلص الليلة.

وعلى طرية الرسبشنات، عجبني تصريح النائب جمعان الحربش اللي ينبه فيه الخارجية إلى أن يوم 25 فبراير يصادف يوم جمعة، ويقول لازم يراعون موعد صلاة اليمعة، وأنا ما أذكر إن في استقبال عقب الصلاة العادة كله المسيان، عاد تخيل استقبال يكتبون بالدعوة يتشرف سفير دولة الكويت بدعوتكم لحضور حفل الاستقبال بمناسبة ذكرى الاستقلال والتحرير لدولة الكويت وذلك في تمام الساعة بعد صلاة الجمعة .. ويكتب تحت يوجد فاليه وخدمة إشراف على الأطفال وممنوع إدخال الموبايل بو كاميرا .. عجايب

فبراير برة الكويت غير، أحلى ما فيه إنه كويتيين فري، بس وين يا خلاف، الكويتيين شعب سفار يغشون على السفر، بالليل يشكون من القروض والظهر على طيارة القاهرة وإلا بيروت، الحين يقولون الكل واشه دبي، السنة ماش لا بيروت ولا قاهرة حتى البحرين خنت حيلي مو مثل قبل ما أدري منو قط عزيزو فوق سطح الوطن العربي.

بحكم سفري الدائم والمتكرر على سنع وغير سنع في آن واحد، بديت أفرز الأماكن اللي يترددون عليها الكويتيين علشان ما أووط فيها، وصار لي في كل ديرة خن وزاروب، لكن جم مرة أطيح على كويتيين ضايعين بالمكان اللي أنا فيه، أقوم أتنشن وأراقبهم من بعيد لي بعيد مثل أفلام العصابات وأحط إيدي على الزناد وأنخش ورى الباب لين يعدون، السبب بسيط لأنهم دعل وملاقيف، ويطلعون بكل مكان، وصار التحدي نطب ديرة ما فيها كويتيين أبد، أو نحسب طول السفرة جم كويتي وكويتية مروا علينا.

خوش عيل، ما تبون شي، الحين لازم أفل قبل ما يفصل النت، واللي يبي يسمع قصصي مع الكويتيين يحط اسمه عند الرسبشن.

تشاوووووووووو

@fahadalaskr

اليوم فجأة قررت أدش تويتر، خبركم عقب ما رحت هناك حتى البلوغ لوما الحيا جان ما دشيته، طبعا فيسبوك خنت حيلي حيله سامحنا على القصور، نقلنا الناس كلها تويتر وسحبنا من متابعين البلوغ ومعاهم شوية كوناكتس قدم على شوية ربع وفتحنا الدكان بالسوق الداخلي بشارع تويتر، وأمس أقول حق مشعل الذاير أبي أغنية مثل يا التاكسي بس تصير يا العسكر.

اليوم وأنا رايح الدكان بتويتر، وإلا علي الدقباسي عضو مجلس الأمة الكويتي بويهيي يصبح ويقول صباح الخير، جان أرد عليه صباح النور يا مشمش طري مبلول، وتوني بنزل فيه وإلا أتذكر إن بس عندي 140 حرف مع الفواصل والنقط، وأنا واحد أحب أنقط، يا من ذا نقوطه نقوط فهد العسكر، لا مالت عليه ولا على قراء بلوغه والسامع يقول آمين، وبعدين صار النقوط مختلف عقب الحداثة والمدنية منها أحلى تحية لمسيو فهد، وأحيانا ذس از كومبليمنتري فروم مستر فاهاد الاسكر، طبعا يعتمد حق منو ووين المكان وقيمة النقوط وإذا كان نقدي أو عيني.

أرد حق المشمش طري مبلول، الحين في عندنا ظاهرة الإعلام الفاسد والإعلام الفرش، شلون يصير فرش وهو قديم، تالي قالوا لأ الإعلام الفاسد والإعلام الحر، شلون حر ونص أخبار الكويت اللي بالديوانيات ما توصل باب الجرايد، وبعدين سقف الحرية أوطى من قاع المدونات، يعني النيو كمر اللي أهم إحنا نتقبل الرأي الآخر أكثر من الإعلام الحر.

ما علينا

المشمش طري مبلول مع ربعه شقونا بالتويتر، شقونا بكل ما تحمله هذه الكلمة من معنى، إذا مو هم ربعهم، إذا مو ربعهم، ري تويت، إذا لا أهم ولا ربعم ولا الري تويت، الجرايد والخدمات الإخبارية، يعني اليوم الثابت إن النواب صاروا ياخذون أكثر من نص نهار بس علشان يكونون معانا.

تدفع فلوس علشان تتابع الأخبار، يطلعون لك النواب ها ها ها ها ها ها، تنغث بمسجاتهم وتصريحاتهم، يقومون يا الله من فضلك الخدمات الإخبارية يكون رويترز نيوز، الوطن يعيدون اللي تنشره الراي بدون ما يذكرون إنه من الراي، وإذا مو من الراي خذوه من الخبر، وبرلماني وسكوب ينبحون من صوب ثاني.

كونا عقب ما كانوا يتأخرون في بث الأخبار الحين صاروا يسيئون لعلاقات الكويت مع الدول الشقيقة والصديقة، وزير الخارجية يوقف وينشف ريجه بمؤتمر صحافي وهو يمدح بقطر عقب خمال وزارة الإعلام وتسكير مكتب الجزيرة يقومون كونا ما ينشرون لأن محررهم بمصر أهلاوي ما يحب المحترف القطري حسين ياسر اللي يلعب بنادي الزمالك، يعني دبلوماسيا انييب اليهدة وتفل السالفة على مباراة كرة قدم.

الإعلام الرسمي الله يزيد النعمة، يستضيفون سلوى الجسار، والشباب يلعبون معها على تويتر مان تو مان، وحدة ذاك اليوم تسألها عن البطانة مالت النفانيف وواحد يبيها تسوي مطبق بمناسبة الكريسماس ويقول لها ما نبيج تخلطين الدين بالطباخ، وواحد يقول لها ليش ما تردين علي، بس يعجبني إصرارها على التواجد وعدم الالتفات للمغرضين.

الحين خلصنا من النواب على المسجات طلعوا لنا على تويتر، نائب يداوم بالمسج ويكلم العالم بتيوتر، ويبينا نتعنى ونروح ننتخبه، ما يصير ندز أحد بدالنا أو بالقليلة ندز له برودكاست بدال العنوة.

حبايبي النواب ملاسنكم داخل القاعة تحطونه ورى الأكاونت وتدشون اهني بأدب، وعلى فكرة ترى كل الربع حاسمين قراراتهم، وما فيهم أحد يمشي عليه التقلقس، ولا تسوون روحكم مهمين تنطرون الربع يردون عليكم، اهني بتواجهون الحقيقة، وتحملوا اللي اييكم، وترى العبرة بتعليق الربع على اللي تقولونه، مو بكثرة التابعين واللي تلحقونهم، بس والله الدنيا دوارة، عقب ما كانوا الناس يلحقونكم وين ما رحتوا، اليوم صرتوا انتوا اللي تلحقون الناس .. دنيا.