التضبط عندنا والتضبط عندهم

نكمل لليوم الثالث على التوالي إيماننا بالمسؤولية الوطنية، والرغبة الجادة بسد النقص المفاجئ بعد غياب الأصدقاء المدونين الذين زعلوا من نتيجة التصويت منح الثقة لوزير الداخلية أول أول أمس، لأن فيهم غارية على المال العام، وعندهم موقف من اللي صار، ولأن الموضوع بكبره ما يهمني، وأنا خلقة ما أشتهي لا مسلم ولا وزير الداخلية، والمدونين أعلنوا الحداد لمدة ثلاثة أيام، وحطوا بانر فيه جيس مال عام وتحته نعي، قررت أنا فهد العسكر، أسوي مدونتي سمردحة، وإن شاء الله كل ليلة عندنا حفلة، وكبوولز حق اللي مو عاجبه من ربع هايف والطبطبائي، لين يطيح اللي في راسهم، لأنكم يا حبايبي صج ما تستاهلون يعاقوبنكم المدونين على موقف سياسي إنتوا مالكم ذنب فيه، وفقنا الله وإياكم لما فيه مصلحة الكويت.

أما إضافة اليوم فهي من نصيب رفاق الدرب بالتيار الوطني، أول شي أنا مع الثقة بالوزير، وضد بيان التحالف، يعني أنا واقف بصف 30 نائب، بس تعالوا، شبتسون مع أسيل والعنجري، هذولي عيالكم، اثنين مثل مثل ماكو، الأول ضد والثانية ممتنعة، طبعا أنا وايد عاجبني موقفهم، ولهم مني كل التقدير، بس تعالوا هني، إنتوا نزلتوا بيان وقلتوا لازم العالم ما يعطون الوزير الثقة، بس الشباب ما صوتوا مثل بيانكم، سؤالي شبتسون فيهم، وعلشان تكون الأمور واضحة، محمد العبد الجادر، عذربتوا فيه وطلعتوا فيه ألف عيب وعيب، بس لأنه قدم مشروع بقانون القرض العادل، وقلتوا هذا مو كفو يمثل التحالف، فأرجوكم الرد على قدر السؤال أسيل والعنجري شبتسون فيهم، عقب ما صوتوا عكس بيانكم؟.

موضوعي:

صافن هاليومين على مسلسلات من زود الفراغة، ولأنه حر وأنا بشرتي ما تتحمل أهوهي بالقوايل، إضافة إلى أن الجو غبار، وأنا من كنت بالروضة فيني حساسية من الغبار، الشاهد، المسلسلات اللي نايم بمردان الدي في دي بلير عليهم كلهم أجنبية، وطايح على فيلم يديد إسمه السب تايتل بالانجليزي، علشان السبيليغ عندي يتقوى، خبركم أنا بالإنجليزي لهلوبة، بس مشكلتي بالغرامر والسبيلينغ أما فيما عدا ذلك كله تمام يا أفندم.

لاحظت بالمسلسلات إن التضبط برة الكويت وايد سهل، ما يبيله شي، يمر البطل على البطلة، بالمكتب، نطلع نتعشى اليوم، فوقه، فوقه، الساعة جم، دنر آت آيت، خلصنا، خلصنا، كونسدرت ديت، يس ات از، مع موسيقى هادية، والمشهد اللي وراه بالمطعم، وتالي مع بعض يا داشين شقته يا رايحين شقتها، وثاني يوم تليفون شلونج شخبارج، ترة سهرتنا أمس فلة، لا طاب لك المكان عاود، خلاص، نشوفج على خير، وصاروا ربع لي أخر حلقة.

بالكويت، التضبط مشروع حب، يعني على الأقل لازم يكون فيه رشة رومانسية، لكن توقف على الإشارة تطالع المزيونة اللي يمك، تنزل الجامة، تقول لها مساء الخير، ترد عليك ليش تخز، شنو ترد عليها، وبعدين الشباب، آه يا الشباب، واحد يبي يضبط وحدة، شكو يرقص لها بالسيارة، ويطول الموسيقى، ساعات ودي أنزل وأسأله، يرحم أمك شنو قصدك باللي قاعد تسويه، والثاني مزاجه بالمغازل توصيل منازل، أما غرامي اللي يكون بقهوة أو مطعم، يشوفها وتشوفه، زين روح حاجها، لأ أبي أدز لها رقمي بلوتوث، زين شعرفك أيهي فيهم، ما أدري حظك نصيبك، ترى دزيت بس مو اهي، شلون، سوى اكسبت بدون ما تشوف التليفون، شدارك، شفتها، زين شنهو تليفونها، نوكيا ان 71، شعرفك، أعرفه، عمى بعينك أنا الأجهزة لين الحين عندي بأساميها بشار والكاتل والكميونيكيتر والأمين وانطلق ستة، شعرفك باسامي الأجهزة، وشنو هالفراغة، كل يوم والثاني قاعد تحفظ أرقام الأجهزة، جنة عندك امتحان، ماسك الإعلانات وقاعد تسمع.

التضبط بالكويت لازم فيه عنوة، الحق، وانزل من السيارة وكلم، واقنع، وتالي تاخذ الرقم وما تدق، زين ليش ماخذته بالبداية، وإلا تييك الثانية، الأخت راكبة مع صاحبتها، لا هذه تبي تترقم جدام رفيجتها، ولا هذيج تبي هذا يرقم رفيجتها، ليش الحسد وتقطع الأرزاق ما أدري، وبعدين ليش لازم ألحق، تبين الرقم أخذيه، ما تبين لا تعطين إشارات قبل اللفة بكيلو، يعني بطق فوق حدر.

مشكلتنا إن الترقم بالكويت معركة حقيقية، احتمال تنتهي بإصابات ومخافر وقضايا، مع العلم بأنه مشروع حب، شنو هالحب اللي أوله هوشة وآخره مخفر، تلحق وحدة، تشوفك وتشوفها، تبيك وتبيها، يدخل راعي همر، يحجب عنك الرؤية، ليش ما تعطيني ويه، ينام عليها، يا أنت تصعد الرصيف يا اهي، وعقبها يكمل ولا هامه، وإلا هاليومين هابين بالسيايير الي توايرها كبار، ليش يا ربي أركب سيارتي بسلم، أنا صاعد سطح ملحق وإلا راكب سيارة.

تنعجب بالبنت بالصالحية، تقفل شغلك وتطلب الحساب، تبدأ رحلة الصيد، أول شي حسبالك البنت كول ساكنة الضاحية أو النزهة، تطير وراها، يا ربي وصلنا كيفان، ويهها ما يعطي على كيفان، أكيد اليرموك العديلية، تطوف الخالدية ماكو بوادر، لا أنا ما انتبهت حق الموتر، الموتر يعطيك السرة قرطبة، دخلنا الخامس، إذا يمين وخر لأن الخط هذا نهايته الأندلس والعمرية والفردوس والعارضية والرابية، وأنصح جديا بالابتعاد عنه، أما إذا خذت يسار فتدخل في مرحلة التوقعات مجددا، أنا قلت شكلها رايحة السلام أو حطين، كول بنات جنوب السرة، لا طافت الجسر، زين الجابرية مش بطال حتى بيان ما تنعاف، عدينا مدخل بيان، لا مو معقول الرميثية، تاخذ يمين تنعش آمالك، حلاتهم بنات مشرف، تطوف مشرف، فتسأل نفسك، يوم إنها رايحة سلوى ليش ما كسرت من قبل، تطوف مشرف، وتدخل أنت مرحلة الخطر، لا يكون صباح السالم، لا مو صباح السالم، خلاص باضت لك بالأفص، المسيلة، إذا مو المسيلة بو الحصانية، تاخذ يمين، خلاص رسمي بو الحصانية، تطلع آخر شي رايحة بيتهم بالعدان، ليش أكلم وحدة ساكنة بمبارك الكبير، وليش أكلم وحدة إذا أبي أواعدها بالديرة أضيع 40 دقيقة، عشرين رايح وعشرين راد، ولا فوق هذا تقول لك ما عندك خوات تخاف عليهم، أو تعطيك السؤال المليق، ليش لاحقني، يعني ليش لاحقج، بوصل هدومي المصبغة، طبعا بعرف وين بيتكم، ليش تبي تعرف وين بيتنا، على شوية تتريك بالرموش الصناعية، علشان أتزوج، بس أنا مرتبطة، جربي ما يضر، لا ما أقدر رفيجي يزعل علي، زين خليني أتفاهم معاه، شلون تتفاهم معاه، بنلعب بلنتيات على قول واحد، واللي يفوز تطلعين له مع الكاس، شوي وإلا صوت دورية، خير يا الطيب، ما كو شي، حرك حرك، حاضر عمي الضابط، تمشي يقوم الضابط يرقمها، زين وين العدالة، أنا لاحق من الصالحية، والحبيب يا خذها باردة مبردة، نار شبت فيكم اثنينكم، زين أحد يعطيني فلوس البنزين.

أنا اللي يقهرني لما البنات يقولون عمى بعينهم الشباب، شلاقين بهالأحنبيات، وإلا ليش كله طايرين ومسافرين، شفيهم بنات الديرة، ما فيهم شي يمة، برة طير لها على طاولتها، كلمتين، يا لقحت وإلا ما ضرها الفحل، بالكويت تروح تكلم وحدة عقب نص ساعة أمك تدق عليك ليش لاحق فلانة، منو فلانة، بنت فلان اللي أمها رفيجة خالتك، وتمرها بالدوام كل يوم اثنين، زين أنا شدراني، وبعدين اهي الله يهداها ليش تعلم، وعلى هالوصف بالعلاقة أنا افترض إن الحين مو أقل من 5 يدرون إني لاحق وحدة ومو معطتني ويهة، وين أودي ويهي أنا الحين من أمي، يعني أنزف وأنا مرقم أحسن مما أنزف وأنا مندقر، دام إني منزف منزف.

آخر كلام:

أمس غشيت على حامي الديار، مع العلم بأن صار لها أكثر من عشرين سنة، لكن جنها من وحي هالمجلس، المقطع الأول، المقطع الثاني، عليكم الله عبد الناصر الزاير ما يذكركم بواحد تعرفونه على موضوع ازدواج الجنسية والقبايل؟، والبشة لما طلب نقطة النظام ما ذكركم بصاحبنا، خاصة في موضوع الطلبة، والدستور كالجسد إذا اشتكت منه مادة، أما وزير الصحة، فمن قبل ومن بعد سيم سيم، أنا فقدت لما قاله بو حامي عندك قلم؟، ورد عليه: ما فيه حبر، صج نحيييييييييييس.

مداخلة أخيرة، وزير التربية يذكرني في انتركويت، زعول زعول من أدناة الدون يزعل، وإلا أنا تشرتشل يا ايزنهور.