من نقلت دوامي لي الصالحية، وأنا حياتي متغيرة، أحس ماني الأولي، كلش مو رفيج سوق واجف والمباركية، ونفسي ثجيلة على الشامية وعبد الله السالم، لأني صرت أداوم بالصالحية حيث تصنع الأموال، الصالحية، وول ستريت الكويت.
ذاك اليوم، صار عندي بريك، دق علي رفيجي، وين الوعد، قلت له المجمع، وعلى فكرة ترى المجمع عند أهل الصالحية يعني مجمع الصالحية، تواعدنا أنا وولد الحلال، على الباب، لا أنطرك يم ستاربكس، لأ عند كارتير، دق علي لما توصل، دق، وينك؟، أتمشى، إطلع لي أنا عند الفاليه، وين بتروح؟، خلينا نشوف كاريبو الجو حلو، لا يا معود أنا برستيجي ما فيه يويديني هناك، أنا من ربع شورت سي أو دي بيبر كب ومعاها كوكي من ستاربكس، طلينا برة، ردينا المجمع، وإحنا بالطريج تليقف صاحبي وقال خل أدش تودز، يا معود شلك بهالسوالف؟، قال بشوف التشكيلة اليديدة.
دشينا تودز، بجم هالجوتي يا الحبيب، 150 دينار، نطت عيوني من مكانها، كويتي ولد عمي؟!، إي حبيب ألبي كويتي، ويتمطع بالواو، ومتى الخصم؟، لهالئ منا عارفين الإدارة ما خبرونا، خوش عيل، وإحنا طالعين، وإلا هالخشف، شنو حلاة، شنو جمال، شنو جسم، شنو شعر، جان أقول حق صاحبي، والله لو بـ 1500 دينار ماخذه ماخذه، وإذا ما في مقاسي نشوف لنا دبرة نقعد بالمحل لين الذيب يصير بالجليب.
يرضيك يهديك، أبد، ماخذ الجوتي ماخذه، فجأة صار الجوتي أغلى من وايد ناس أعرفهم، المهم، قلت حق الأخ اللي واقف دخلك حبيب ألبي فيك تأمن لي شي 43 بني، مع كسر الباء، رد علي إيه ولو مع سيحيان بالهاء، ودز الهندي يدور مطلبي.
ديورنغ ذات، الخشف كانت تقلب بكل الجواتي اللي بالمحل، بما فيهم البلوغر وصاحب البوست نفسه، تالي قالت له وهي تطالعني ما أدري ليش: أبي بلا نيلة أسود سادة، أنا طارت بوهتي، بلا نيلة مرة وحدة، وصلنا بالكويت لي هالمستوى، جوتي اسمه بلا نيلة، تالي رد عليها: بس مودموزيل ما فيه أسود سادة، عاد أنا قلت معقولة يعني طوف بلا نيلة، ودقق وايد على اللون، تالي رجعت وقاست واحد ثاني، وعقب تلفتت، وقالت حق البياع: قالين لي عندكم جوتي كعب أسود بـ 165 دينار وينه؟
أنا يوم شفت الوضع قلب من أسماء لي ألوان وتالي صار أرقام، بغيت أتليقف، لكن آثرت الصمت رغبة بامتصاص كامل المشهد، الله يا الزمن، عقب ما كنا نسأل حق المدرسة عن جوتي أسود لماع أو باليه أبيض مع طوق حق حصة الجمباز، صار الوضع الحين نسأل باللون والمقاس وتالي إذا ما ياز لنا شي نسأل عنه بسعره، خلاص فسقنا، صار السؤال وين الجوتي اللي بـ 165 دينار جذي نهارا جهارا، الله يكافينا الشر، 165 دينار يا بنت الناس تأمن 3 بيوت بالهند وإلا بنغلادش، الله يا يالدنيا، الله يكافينا الشر ويبعدنا ولا ياثمنا، بس ولد اللذينة طلع عارف الفلم، وقال لها إيه مودموزيل هيدي هو اللي حكيتي عنه، وقايسته الأخت، طلع كعبه عالي عليها وما ياز لها.
الخشف على فكرة إذا تزوجها الكافر يسلم، ملكة جمال، تطالع من تحت لي تحت، ما أدري هل قصدها تتعرف وإلا قاصر عليها فلوس ومتوهقة تبي تشتري الجوتي ومنحرجة تطلب مني باجي المبلغ، مع العلم بأن جنطتها وايد أغلى من جم وحدة كنت أعرفها.
الطول كويتي بحت، 165 سم على قلب العدو، يعني طولها وسعر الجوتي اللي سألت عنه واحد، الشعر منهدل على الجتف، العيون كهربا، الرقبة بحجم كف الإييد، الخدود مال تحلف عليهم، الريول أووووووووووووووووووف، الركب مو سود على غير عادة الكويتيات، خلاص ما فيني أتكلم عن شي أكثر أو أرفع من هذا حفاظا على الذوق العام.
وأنا قاعد أتأمل المشهد، فجأة فلاش باك بن كلب، وإلا أنا مع وحدة داثرة أعرفها، الأخت إذا كشخت راحت سوق شرق، وإذا قررت تقز مع رفيجاتها دزوا فرايديز البحر، ناس آخر روزنامة علقوها على طوفة بيتهم العجيري عام 1999، يعني حتى ما لحقوا على الألفية، لا وساكنة بالدسمة بعد، أقول لها سلايدر ستيشن، تقول لي هذا وين، لا يكون بالإفنيوز؟، لأنها مرة راحت سينما الأفنيوز وضاعت ما عرفت وين صفطت سيارتها، البنت صج داثرة، نوعها إذا بغت تتمشى مع رفيجتها طلعوا باللانسر وهي عندها تعادل باناميرا، وراحوا حديقة الشعب أو لبسوا أحسن ما عندهم علشان يروحون ليلى غاليري يشربون قهوة.
هذي وين وراعية البلا نيلة وين؟
دقيت على الحب الأبدي، تكفين لحقي علي، خير عسى ما شر؟، بذمج في جوتي اسمه بلا نيلة؟، جان ترقع بالصوت الرقيع ضحكة ترن على حسها الدنانير الذهب، المهم، شنو بلا نيلة، بلا رينا، يعني جوتي راقصة الباليه، جان أقول لها وشدعوة اللي يحاجيج من مواليد روما وعايش بجنيف ودارس بالسان ريموه، (ترى ما أدري إذا في شي اسمه سان ريموه بس لقيتها ماشية مع السياق)، قالت لي إي هذا جوتي معروف، قلت لها يا عمري أنا ومستشارة البوست لشؤون الفاشون متهاوشين، وحاط إعلان أدور وحدة تسد مكانها يا عل مكانها يفضى بالدنيا عقب ما تموت وما يدرون عنها إلا عقب أربع أيام، الله لا يردها، عمى بعينها الحيوانة، كلبة، راحت ما ردت.
سألتني، صاحبة الضحكة الأحب إلى قلبي، شنو سالفتها مستشارة البلوق لشؤون الفاشون؟ وقلت لها السالفة اللي ذكرتني بوحدة ثانية حقيرة، عاد هذه بشلئ شوي وبقول سالفتها.
الحيوانة، عرفتها ويوم قررت أتزوجها الهبلة، دقت الشرف، وأنا عطيتها على فالها، بس الثورة، شافت حالها علي، أيا حمارة، هذا وبعد أنا اللي عارض عليج الزواج، والمنة عليج بعد، ويايج ياللي تقومين من النوم وما تغسلين ويهج إلا عقب ساعة، وعقب كل هذا تقولين أفكر، عيل لو أتقدم أنا حق بيونسي وإلا كاميرون دياز شتقول يا خبلة، هذا اللي ناقص.
عمى بعينها حتى عمى بعينها، يا عسى يوم تموت يطق مطر ويطفح الدائري الرابع، ومحد يقدر يوصل المقبرة، ويصلون عليج ثلاثة، قبل صلاة المغرب بربع ساعة، وما يمديهم يساوون قبرج عقب الدفان، وتقعدين يومين يخر عليج القبر ومحد درى عنج، وإذا خلص المطر والناس زاروا المقبرة، ما أحد يعرف قبرج علشان يقرا عليج الفاتحة، ومن سوء حظج ماكو إلا أنا أعرف وين قبرج، وإييون الناس يسألوني وين قبرها، ومن زود اللعانة أوديهم حق قبر وحدة ثانية يقرون عليها الفاتحة، حريمتج يقرون عليج الفاتحة على إيدي يا حيوانة.
عقب كل هذا، وعقب الداثرة اللي أعرفها، والحمارة مستشارة الموضة، والحيوانة اللي يا عسى ما تنزل الرحمة على قبرها، عقب كل هذا أنا واجهتني مشكلة.
صار لي أسبوع حايس، انصفق ويهي، غارت عيوني، أسودت جفوني، لا وضعفت 2 كيلو بعد، ما بقى نت، ما بقى واحد أعرفه بإيطاليا، وإلا حتى أحد وهو راد من السفر يمكن طيارته توقف بمطار هيثرو، ولا أحد يعرف أحد بفرنسا، حتى الربع بالخارجية ما خليتهم، واللي يمونوون على ناس بالخارجية، واللي يعرفون أحد بالإمارتية، مووووول ... أبد، ما بقى أحد ما طليت بويهة، تكفون يا الربع يا نشامى، بلارينا أسود سادة، أبد ما بالحمض أحد، عقب كل هذا طلع ماكو عند تودز أصلا بالارينا أسود سادة، لكن عشمنا بالله كبير عقب ما لقينا بعد كل هالشقى بلارينا تودز أسود سادة بس عليه خط فضي على كتر.
بذمتكم، عقب كل هالشقى، تهقون لي رحت حق راعية البلارينا، وقلت لها معاناتي، وإني لقيت لها بلارينا تودز أسود سادة، بس عليه خط فضي على الجنب، لكنه كلش ما يبين من جدام لي مشيتي، بتقول مشكور حبيبي عطني رقمك، لأنك الوحيد اللي لقيت لي الجوتي الوحيد الي يمشي مع بدلة السهرة، وإلا نوعها بنت الكلب بتشالئ علي عقب كل هذا وتقول سوري أصلا الخياط ما خلص بدلتي، وخرب الخام اللي شريته من لندن، وتالع تطلع لندن اللي شرت منها الخام سوق الجملة اللي ورا سلايدر ستيشن ويم المدرسة الشرقية، وبعدين موعد العرس ياي مع موعد دشت أمي المستشفى، ولذلك أنا بعتزر منك كتير ما فيني آخود هابالارينا، بس خلني أشوف الصاحب يمكن هديه الله ويشتريه، علشان أرد عليها يا عسى الصاحب اللي ياي يشتريه لج يدعم على دوار الشيراتون، ويدفنونه يم الحمارة اللي فوقج، يا قليلة الأدب؟
