بيض عيون وبتزا الساعة 11

يعني تخيل لو اللي تعرفها تقول لك اسمح لي بعد أذنك حزة البرنش مالي، شبتقول لها؟!

أكيد بتقول: حبيبتي عساه مداخيل العافية.

وطبعا لو كانت طالبة بثانوية المنصورية، أكيد بتقول لها: هني يا عمري هني.

بنات ثانوية المنصورية .. آه .. الضاحية، المنصورية، قليل من القادسية وعدد لا بأس به من جميلات بعض الضواحي المحيطة بها.

لكن شبتقول لي صار معاك هالموقف.

إذا بنات ثانوية يسوون جذي، لا صارت موظفة بالصحة وإلا الشؤون شبتغبر بروحها؟ الأخت بين الفرصتين تودي صمونة بيض عيون وبيتزا وكاتشب، وأكيد قبل لا تروح الصف تنام لها اب دايت كوكا ودونت على الطريج من المقصف.

وبعدين يقولون ليش بالكويت زايدة معدلات السمنة؟، ليش ما تزيد دام بنات الثانوية لا حسيب ولا رقيب، يدخلون أكل ويهدونه ينضى بالفرصة، وين وزيرة التربية؟، طالبة تاكل صمونة بيض عيون مع فلفل أسود وتلحقها اب بيتزا الساعة 11.

وين قاعدين، وين المسؤولين عن الي قاعد يصير بمدراسنا؟ وإلا بس شاقينا بويات وعبدة الشيطان، وبعدين ليش أكو سيارات داخل المدرسة، من سيارته هذه، وليش صافطين بالساحة؟ أكيد دام المدرسات ما فيهم حيل يمشون، من الطبيعي إن تقوم مجموعة طالبات بقلاي بيض وتحضير بيتزا بالمدرسة.

يا ناس صمونة بيض عيون وبيتزا الساعة 11 بالثانوية، صدقوني ماكو خطر أكبر من جذي يهدد مستقبل شباب الكويت.