حبج سباني يا سمرة

عيزت أبي أنام ماني قادر، صورتها لين الحين في بالي، من الظهر .. 15 ساعة أشوفها جدامي وين ما أروح، من أغمض عيني، اليوم الظهر .. ليتني ما رحت أشرب قهوة .. أنا خلاص أبي أستقيل .. بعزل الدكان وبصفي الحلال وبهاجر.

اليوم الضحى دق علي واحد عزيز .. صوته متضايق .. يبي يسولف .. قلت له مرني ونروح نشرب قهوة بالصالحية .. وصل ودق .. يا ليته ما دق.

قعدنا على الطاولة .. جابلته .. يا ليتني نقيت طاولة ثانية .. على مرمى النظر كانت قاعدة .. ابتسامة وحدة منها كانت كافية .. فجأة قمت أشم ريحة ورد .. واستفليت .. كانت تطالعني من تحت لي تحت وتبتسم.

المشكلة إن رفيجي على اليسار وقاعد يسولف .. مرة يشتط وياخذه الحماس يدني ويسد الفيو .. أرد أنا لي ورى علشان أشوف .. تالي يريح لي ورى وأدني أنا جدام .. دودهوني اثنينهم .. أطالعها ترجع تطالعني وتبتسم .. ما أدري لي ما أدري حق اللي معها بالطاولة .. أرد أركز مع صاحبي يطلع طايفني سطرين من السالفة .. أحاول أركز معاه .. من ألقط طرف الموضوع .. تقتحم المشهد .. أركز معاها يطوفني هم سطرين من السالفة.

أجدم .. يجدم .. أرد ورى أشوفها من ورى طرف غترته .. تطالعني وتبتسم .. المشكلة إن عيني اليمنى تعشي ما أشوف فيها زين .. فلازم أشوفها باليسرى .. يعني أدني ورى وأشوف رفيجي باليمين اللي ما أشوف فيها زين وأركز عليها باليسار .. كان الوضع على الطاولة اجتماع هداهد .. نجدم ونرجع .. عكس بعض .. جنة قاعدين بكتّاب عند الملا نسمّع قصيدة.

تدودهت .. عيونها لين الحين لو أغمض أرسمها .. المشكلة إني أصلا ما أنام زين هالدور أفكر قبل لا أنام .. عبالة .. ماني عارف شسوي.

حبج سباني يا سمرة وسرق ليلي .. ولا أقدر أعصي أمره آه يا ويلي .. والشوق يا سمره سمّر علي بابي .. شوّق عيوني وضوا قناديلي، عاد إهي من زود العيارة قامت تشاغبني .. وتلعب معاي عكس عكاس .. أيي جدام ترجع ورى .. وبعدين قامت .. اشتط صاحبي وأنا أقول له هدي بالك علشان أقوم ألحقها .. يشتط .. أمسك إيده أهديه أقول له تعوذ من إبليس الدنيا ما تسوى .. يقول لي شرايك إنت لو مكاني شتسوي؟ .. أصفن من زود التدوده .. ماني عارف شسوي لاني مركز معاه علشان أشور عليه ولاني من اللي قامت وهدتني.

أخطر بعد سطرين من السالفة .. أرجع أقول له زين عيد علي وين المشكلة .. أنا بصراحة ماني شايف مشكلة .. على أساس يعطيني بريك يفكر وفي هذه الأثناء أقوم أنا جني بروح الحمام وألحقها .. توني قايم .. ألاقيها رجعت وقعدت على الطاولة .. محرج كان الوضع .. يقول لي رفيجي شفيك هونت .. أرد أقعد أطلع رفيجي وابتسم .. وأنا طبعا مو قصدي ابتسم له .. ينزرني ويقول أحر ما عندي أبرد ما عندك .. أنا أسولف وأنت تبتسم .. أقول له حبيبي أنا أعالج مشاكلي بالابتسامة .. يرد لي ورى ويلوي بوزه .. أجدم أنا وأتبوسم .. تطالعني وتبتسم .. شالدبرة؟

فجأة قرر يمشي .. وين؟ هدي بالك وين رايح تونا عارفينك؟ .. لحقي علينا يا بنت الأيواد ..قلب المولع ذايب يا مزيونة .. مجبور ولا هو تايب من فنونه .. متى يشوف الحبايب يدارونه .. يا نفحة الورد بالله قولي لي، ترد على الأغنية التي رددتها في سري بابتسامة.

يتوتر الجو .. يعني أشق روحي نصين .. نص يروح ونص يقعد .. اقعد يا فلان أطلب لك ليمون .. لا خلاص أنا ضاق صدري بمشي .. تعوذ من إبليس .. خلاص خل نطلب الشيك .. تقوم اتبوسم .. أكيد ما تبي ليمون .. يرد علي ما أبي زفت ليمون .. ابتسم لما أبعد منه .. ابتسم للمدى وللمستقبل.

أقوم أوصل معاه الباب .. يكمل السالفة .. الظاهر الموضوع فيه هوشة اهو متخانق مع أحد .. بس اللي لحقت عليه من السالفة عقب ما جمعت الموضوع على اللي ضافه لي بالطريج الظاهر كان فيه خطبة أو ملجة أنا ما ركزت .. بس في شي صار بالنص .. يطلب سيارته على ما يتزنقح مال الفاليه .. يا كرهه .. يمشي على بيض .. على ما يت السيارة إلا أنا ناضي .. أبي أرد حق السمرة اللي شوقها سمّر على بابي .. أنا توقعت على الوقت اللي خذوه علشان توصل السيارة إنهم كانوا صافطينها بالشامية.

وصلت السيارة وصاحبي يبي يكمل .. أنا أقول له سيارتك وصلت وأهو يبي يكمل بعد .. بغيت أشوته داخلها بس الله هداه وركب السيارة .. وقال لي بدق عليك أكمل السالفة .. على ما كمل الجملة وإلا ما يشوف إلا غبرتي .. رجعت طاير .. وإذ بالطاولة ذاتها تغص بالشبان .. ما يعني أن الوقت المستنفذ لأن يكمل صديقي حديثه ويُؤتى له بسيارته استغرق أن تطلب طاولة مليئة بالحسان وعلى رأسهن السمراء التي سمّر شوقها على بابي وشوّق عيوني وأضاء قناديلي طوال الساعة الماضية الفاتورة، ثم يدققنها فتدفع إحداهن الحساب بعد مشاجرة بسيطة صامتة تخللتها طلبات جمة بأن تدفع كل واحدة منهن الحساب، حتى رست الفاتورة بيد من تحصلت عليها بالحيلة لتقرر أن تدفع وحدها الحساب ببطاقتها الائتمانية، معتبرة ألا فرق بينهن، فتشير للنادل بالبطاقة التي أخرجتها من محفظة دستها بحقيبتها المستلقية على الأرض يمين كرسيها، فيعود بعدها النادل وبيده جهاز الدفع الآلي ليستلم منها البطاقة ويمررها قبل أن يدخل المبلغ، اللحظات الفاصلة بين طباعة الورقة الأولى لتوقعها وبين تسليمها البطاقة للنادل تمر وكأنها سنين محملة بقلق من صاحبة البطاقة بأنها ربما تكون استنفذت رصيدها، لأنها في غنى عن الإحراج الذي سيتسبب به النادل حينما يقول لها ألا رصيد لديها على الملأ، فتعبر تلك اللحظات مستذكرة أين كانت وماذا اشترت وكم صرفت، حتى تسمع ذلك الصوت الذي تألفه، إنه صوت طباعة الورقة، لكن هل تمت العملية أم تعذرت؟ يا إلهي .. يقدم لها النادل الوقة لتمهرها بتوقيعها، فتعتريها علامات الراحة، وكأنها نجحت بامتحانها الأخير، وسط تحفظ من صديقاتها اللاتي استعدين للرحيل، لختفين بعد ذلك وسط المجمع، فينظف بعدهن النادل الطاولة لتستضيف هؤلاء الشبان الذين شرعوا بطلب ما يريدون.

تنتهي القصة على المشهد الأخير .. أنا مستلق على فراشي .. أراجع أحداث يومي .. أتأمل ذلك الوجه البشوش .. الخدين الناعمين .. العينين الناعستين .. النظرات التي اخترقتني وأشعلت بي حبا جديدا .. وأتأكد مجددا أن حتى مشاريع القصص الممتعة ربما توأد هي الأخرى في مهدها، فأنا لا أملك إلا أن أعود مسبيا بحسن جمال تلك الفتانة، وأُلزم بأن أدع لقلبي رهانه، وأصبر وأداري حبي لأجلها، انتظارا لأن تغني لي الليالي.

أخليكم الحين مع "حبج سباني يا سمرة" غناء مصطفى أحمد وكلمات يوسف ناصر وألحان عبد الرزاق العدساني.

حبج سباني يا سمرة وسرق ليلي

ولا أقدر أعصي أمره آه يا ويلي

والشوق يا سمره سمّر علي بابي

شوّق عيوني وضوا قناديلي

قلب المولع ذايب يا مزيونة

مجبور ولا هو تايب من فنونه

متى يشوف الحبايب يدارونه

يا نفحة الورد بالله قولي لي

حسن جمالك يسبي يا فتانة

ملزوم أخلي قلبي له رهانه

واصبر وأداري حبي على شانه

ليما الليالي الحلوة تغني لي