Table for one please

وايد مرات يصادف إني أيوع وأقرر أوقف جدام أول مطعم، حزة الغدا is my favoret، خاصة لا صارت متزامنة مع نهاية دوام البنوك والقطاع الخاص.

ويحصل أكثر من مرة، يسألني الويتر اللي يستقبلني على الباب، table for 2 sir?، فأرد عليه no one please، يبتسم ويوصلني حق طاولة، إذا المطعم على البحر آخذ السي فيو، وإذا مندعس أنقي الزاوية.

خبرتي بالمطاعم كـ solo guest عرفتني بأشياء وايد كانت غايبة عني، أو ما كنت أنتبه لها لما أكون مع أحد.

المطاعم بالكويت ساحة النزال الأولى، ولأن فيني لقافة، دائما أربط الأشياء والأشخاص، هذا يبي هذه، وهذه عينها على ذاك، اللي هناك كانت تعرف هذاك، بس الممتع لما أشوف اللحظة الأولى .. أووووووو غرامي اللي ماله مثيل، شكثر أغشي على اللحظة الأولى، متعة ما بعدها متعة لما أشوف اللحظة الجميلة اللي واحد ينعجب بوحدة، أو وحدة بخاطرها تتعرف على واحد، الـ spark of the moment، وما أبالغ إذا قلت في أكثر من مرة ودي أقوم من مكاني أسهل الأمور .. أدزه من جتفه وأقول له سند اصعد وراها .. وإلا أقول لها زلقي وقولي أي خل يساعدج.

ولأن المطاعم بالكويت ساحة النزال الأولى، صدقوني لما أقول لكم إن المواقف أرض معركة حقيقية، وأكثر من مرة كنت أدوس وأنا رايح السيارة أشلاء الإعجاب وبقايا بوادر حب وساعات شلافيح ويه تقطع من الفشلة.

في نينو، دخل الحبيب مع رفيجه، قعدوا بالقسم اللي فوق بالنص، أنا يم لوحة الشوربة، جان تدخل عقبهم بخمس دقايق الأخت مع رفيجتها، أول ما دخلوا راحت الحمام، وأخذ خمس دقايق إضافية، المطعم فاضي، لما طلعت الأخت من الحمام، تلفتت، وقالت نبي طاولة فوق، الحين صرنا خمسة بمكان واحد، شدعوة؟ الضيج بالقبر وعند الله السعة، لو كل واحد منا يقعد بزاوية من زوايا المطعم نحتاج ندق على بعض تليفونات، بس قرادة الحظ.

قبل لا يطلبون .. عيون الشباب معلقة على البنات جنهم قاعد يطالعون مباراة نهائي، والبنات يمشون شوي شوي، جنهم بلقطة إعادة القول بالبطيء، البنات يشوفون بنص عين، معروف الفيلم، الكل يطالع الكل، بس الكل يحاول يبين إنه مو قاعد يطالع الكل، وأنا أطالع اللي قاعد يطالعون بعض ومسوي روحي مو قاعد أطالعهم، والويتر كاشف الوضع ويطالعنا كلنا، بس محد يطالع الويتر.

وصلت شوربة الحبيب، البنات طلبوا، اللي قاعد يشوفهم وده يلبس مريلة ويروح ياخذ الطلب، طبعا لو قاعد ياكل في بيتهم أتوقع حتى ما يوصل بطل فلفل الغراش حق أخته على طاولة الطعام، لا ويمكن يقول لها يامال إيدج الكسر قومي إخذيه، أو يمكن يعصب لأنه مو مقدم زين بالامتحان بس مفتشل من أهله وتصير الصكة بأخته.

الأخت تطلب، يوصل الطلب، يتكهرب الجو، تتحول النظرات الخفيفة إلى خز، الخز يقلب أعصاب، يطلبون الحساب، يقومون الشباب، واحد يقرر يغير من وتيرة دراماتيكية الأحداث، يقرب من البنات، يسود الصمت بانتظار صوت الصراخ أو الطراق .. أيا منهما يسبق الآخر، يتوتر الجو، يكلم الأخت، البنات وكأن على رؤوسهم الطير، يهمس. البنات ساكتين، يقرب مني الويتر، يسد الشاشة، أمسكه من إيده أسحبه يمي، طافتني اللقطة، مشى الحبيب، الأخت مصدومة، يخف التنشن، يلتفتون البنات علي، أنا مالي شغل بس لين الحين قاضب ايد الويتر، أنتبه، أهدها، أرد أطالع البنات، يطلبون الحساب، أطلب أنا الحساب، منو حسابه يوصل قبل، آخر واحد يطلع من المطعم أم عيال، تتسارع الأحداث، نحاسب ونطلع.

أمر يم البنات، متوقع أنحذف بشي، أطلع من الباب، جت سليمة، سبقت البنات للمواقف، الأخت كانت تتزنقح وتشيل الجنطة وتشيك على الميك أب، أروح سيارتي، وإلا سيارة هادة كل المواقف وصافطة يمي، طلعت سيارة البنات، فجأة أسمع صوت صرخة وأنا لاهي بالمسجل بغير السي دي قبل لا أحرك، آآآآآآآآآآآآآآآآآآآآآآآآآآآآآآآآآآ واااااااااااااااااااااااي يممممممممما لحقيني ، مع صوت نواح بالباك رواند، رفعت عيني وإلا البنات شوي ويركبون فوق سيارتي، اخترعت نزلت، خير شفيكم؟ عسى ما شر؟، جان تقول لي اللي مع الأخت، قطوة ......... صمت ..... هناك (تشير إلى حيث القطة بصوت مرتعد).

رحت هناك وإلا تحت سيارتهم قطيوة، حتى فشلة الواحد يقول عنها قطوة، طالعتني وقالت مياو مياو، جان أقول لها تت تت، راحت القطيوة، وركبوا البنات السيارة حتى ما قالوا شكرا.

نصيحتي:

عبر عن إعجابك دون اهتمام للنتائج فربما لن تراها أبدا

أعطه فرصة ليعبر عن نفسه فأنت لا تعلمين من سيكون نصيبك

الدرس المستفاد:

قول حق أهلك الصج ولا تطلع حرة الامتحان بأختك على الغدا

تعلمي كيف تنطقين كلمة "تت تت" فحتما ستحتاجينها يوما ما