الخيل أعرف أصيلها من تقبلي

كنت سأبدأ البوست من حيث ما انتهت إليه كلمات إنجيل القديس لوقا، ثم عدت وقلبت محليا فوقفت أمام سليمان الهويدي، وبينهما توقفت طويلا أمام ابن العربي، ثم عدلت، وفكرت، واحترت بالمقدمة، حتى جاءت أحلام مع نيشان، فعدت لأنطلق من "يا شين السرج على البقر" وتحديدا في جزئية الفرنسي الذي مارسته أمامنا على الهواء مباشرة.

عموما أول أمس وقفت في معرض بالتلال جدام لوحة بقيمة 12 ألف دينار كويتي، اللوحة أربع أوصل كل وصلة متر ونص بمتر ونص، أغلبها بالأخضر مع رشة أصفر على خلفية بني، توقفت أمام اللوحة مليا .. ترى مليا بس علشان أعطيها برستيجها الفني .. مو علشان قيمتها الفنية لكن علشان قيمتها المادية، شدعوة لوحة 3X3 توصل قيمتها 12 ألف دينار كويتي، المتر المربع فيها أكثر من ألف كويتي، وبدون مبالغة سعر المتر المربع باللوحة أغلى من سعر المتر المربع بجنوب السرة.

"وَرَفَعَ عَيْنَيْه نَحوَ تَلاميذِه وقال: طوبى لَكُم أَيُّها الفُقَراء، فإِنَّ لَكُم مَلَكوتَ الله. طوبى لَكُم أَيُّها الجائعونَ الآن فَسَوفَ تُشبَعون. طوبى لَكُم أَيُّها الباكونَ الآن فسَوفَ تَضحَكون. طوبى لَكمُ إِذا أَبغَضَكُمُ النَّاس ورَذَلوكم وشتَموا اسمَكُم ونَبذوه على أَنَّه عار مِن أَجلِ ابنِ الإِنسان. اِفرَحوا في ذلك اليَومِ واهتُّزوا طَرَبًا، فها إِنَّ أَجرَكُم في السَّماءِ عظيم، فهكذا فَعَلَ آباؤهُم بِالأَنبِياء. لكِنِ الوَيلُ لَكُم أَيُّها الأَغنِياء فقَد نِلتُم عَزاءَكُم. الوَيلُ لَكم أَيُّها الشِّباعُ الآن فسَوفَ تَجوعون. الوَيلُ لَكُم أَيُّها الضَّاحِكونَ الآن فسَوفَ تَحزَنونَ وتَبكون. الوَيلُ لَكُم إِذا مَدَحَكم جَميعُ النَّاس فَهكذا فَعَلَ آباؤُهم بِالأَنبِياءِ الكَذَّابين" .. إنجيل القدّيس لوقا: 26-20:6

يوم الأحد اكتشفت عمق الأزمة، أنا متسامح وايد وسمح مع العلم إن وايد ما يشوفني جذي لكن .. أنا ما أحب التصنع، ما راح أتكلم عن الهول اللي شفتهم بمعرض مجمع التلال أول أمس، ولا بالمتصنعات اللي اللهم لا تبلانا لو حصلت درنفيس لفككتهن وحدة تلو الأخرى، المشكلة إني على قولة رحمة الله عليه سليمان الهويدي الخيل أعرف أصيلها من تقبلي، وفي نفس القصيدة يزيد ويقول يقصدني طبعا: أنا اللي أبيه حلو بليا مكياج وبليا حلي .. زينه طبيعي ولا يستصنعه.

علشانكم وعلشان الهويدي وخالد الملا وعلشان اللي في بالي، بس بتكلم عن الذائقة الفنية اللي غابت عن حضور المعرض الفني، كانت المناسبة بالمناسبة وعلى فكرة معرض فني .. لاحظوا معاي معرض فني .. بس القز على ودنه .. والأغلب ياي المعرض والتجوري بالسيارة .. إيشي ألماسات على ذهبان على بروشات.

المشكلة إني كنت رايح بدشداشة عليها طرف زيت علق فيها عقب ما صلحت سفايف السيارة بكراج بالشويخ، وحاط ريحة سي كي ومركب عليها قلم بك ونعال نيدية والقولة مبطلة والغترة هدد وراز النوكيا مع مسباح تراب الكهرب، والصج الصج كان حلمي أسوي مثل روايات نجيب محفوظ وأشوف وحدة مخملية تحبني وأحبها وأإب على وش الدنيا، وآه لو فار الفرارة يحب قطوة.

لكن انصدمت بأن في شي قصير على عاري على هلاقة باللبس، على كعوب مالها داعي، أتوقع لأن المعرض مودرن وفن حديث كان الوضع خلط، ما تفرق بين الانطباعي والتجريدي عن التشكيلي وأشكيلك، وبين النماين اللي زايرة المعرض، فلذلك صرفت نظر وهونت.

الملاحظة الثانية، أتوقع بدون مبالغة كنت أنا .. يا الريال الوحيد .. يا معاي اثنين أو ثلاثة على أبعد تقدير زاروا المعرض، لأن كل البقية كانوا من صنف غير الرجال .. أي نعم شفت حريم ريايل .. لكن هم مع ذلك يتصنفون على إنهم حريم للأسف، وسؤالي ليش التنعم، وين قاعدين، الميش والصدور المبطلة والأساور والمخصر والعرق يهطل، عمى بعينكم يا مال الشرطة العسكرية اييون اباص ويخمونكم يا الخمة .. على طول الجيوان .. تجنيد بابا تجنيد، مالت عليكم.

المعرض أحلى شي فيه إن السيرفس ما وقف، أول مرة أشوف سفرجية يعلون جبدك لين تاخذ منهم شي .. أول مرة تقول ثانكس .. الثانية خلاص يا بابا ثانكس .. الثالثة آي سيد ثانكس .. الرابعة ويهد ما أبي شي .. آخر شي قمت ألبسهم، كبة برغل بقفشة .. عصير كرز بشوتر .. سوشي بصينية فيها جولد فيش .. بس الماي والجاي خنت حيلي صرف ما معاهم دريسنغ.