البطالي باع كوته واشترى له كوت ثاني

وكأنني أعيش وسط الأهزوجة الشعبية .. "البطالي باع كوته واشترى له كوت ثاني" .. أعيشها مرارا، كنت أغير ولا أغير، أبيع كوت وأشتري كوت ثاني، مستانس بالكوت اليديد اللي شريته بفلوس الكوت القديم، بطالي درجة أولى.

الحين عندي كوت يديد للموسم، مستعد أبدله بست كوتات ملوت السنة اللي طافت.

كوتات السنة اللي طافت كلش ما كان لها داعي، وكلفتني أكثر مما فادتني، واللي حرني إن السنة اللي طافت ما كنت بعازتهم كلهم، لكنهم كانوا معتازين معزب يديد، يبون يرجهنون عنده ويضفهم ويبدون معاه حياة يديدة، تقيهم ذل التنقل من معزب إلى آخر.

هذا الموسم الذي لا أعلم كم سيستمر، أجدها فرصة سنعة للتخلص من جميع الكوتات والتشبذ بكوت واحد فقط، لكنه حتما راح يكون كوت مسنع حد الدوسة.

الكوت اليديد سوبر ديلوكس، تبيه كشخة أهو بالأصل كشخة، تبيه ستايل أهو ملك الستايل، على هواك صيف واشتا، يعطيك اللي تبيه، ويمشي مع الدشداشة والجينز، وفيه مخابي وايد لا زادت الخردة، وبنفس الوقت تقدر تخش فيها أي شي ما تبي أحد يشوفه بيدك، ومستعد يصير لك صدري مودرن بالنهار وفورير بالليل.

الكوت اليديد عيبه إنه ما فيه عيب، تاخذه معاك بالكويت الشاليه أو المخيم، وهم تقدر تسافر فيه، وشكلي نلاص على وشك إني أنوي عليه، وبوزع علشانه كل الكوتات القديمة اللي عندي بالكبت، وبالذات اللي مالها داعي ومحسوبة علي كوتات واهي بالأصل موجودة علشان تدفي الكبت.

الحين رضيت يكون الكوت اليديد بروحه بكبت حياتي، بس شرطت عليه بالأول إن هالموسم موسم تجربة، وفاجأني إنه قبل التحدي، وأحرجني بأنه سوووو ستايل وولد حمايل، وهمس بأذني وقال: هذا وإنت بطالي جذي لو بطران شبتسوي فيني؟!