ترى غيرت رقمي

ما أدري ليش أول معالم التغيير تطلع برقم التليفون؟

الأخت تحوس الدنيا وتمشّي لها كل يوم مسيرة من الكلية لي البحر لي باب بيتهم، وآخر شي تاخذ رقم واحد بالفترة الصباحية ومثله حق المساء والسهرة، وبعدين تقرر تغير الخط لما تحوشها ريحة ديانة.

الحبيب يغير دوامه ويقوم يدوح له خط يديد.

الصبي ينحاش من المزرعة ويزبن له عند معزب يديد يغير رقم تليفونه.

مقاول .. نجار .. دلال زل .. محري أثاث قديم .. كل من يغير خطه.

المشكلة مو بالخط اللي راح .. المشكلة باللي ياخذ الخط عقبه.

قبل تعال انقل الأرقام وأكتبهم بمفكرة ما أدري دليل الهاتف.. والنوتة الصغيرة مقسمة على الأحرف، وبعضها ينخش بالبوك .. تالي تطور الموضوع وصارت النوتة أوكرديون .. وأبتلشنا لأنها مو مقسمة على الأحرف فتصير المسألة لوص، تعال فجج لا صار رفيجك اسمه نواف شلون تكتبه عقب واحد اسمه جمال وبعدهم إبراهيم .. حوسة، فلما تدوره تمر على كل الربع، وإذا رقم وحده ما تبي أحد يعرفه تكتبه تحت اسمك، أما البنات خذ عندك التدوده اليازي بالله شلون تنكتب؟ تحت حرف الألف لأنها الـ يازي وإلا الياء لأنها اليازي وإلا الجيم لأن الاسم الصجي الجازي بس الدلع اليازي ..أتوقع اليازي تنكتب على كتر أو مع بيانات صاحب النوتة ما أدري ليش نوتة تليفونات فيها فصيلة الدم، هل إذا صار حادث بيطلعون النوتة ويصبون له دم بدال اللي راح منه؟

عقب النوتة الصغيرة طلعت المفكرات الالكترونية، ودخلنا بحر يديد، كاسيو غيرت مجرى التاريخ، شلون تكتب أسماء وأرقام معارفك مو يمكن تضيع، شنو هالعداء للتكنولوجيا .. يعني الأوكرديون بنت حمولة ما تضيع، بس الكاسيو بنت الخدامة عادي تضيع، وبعدين اللي بيضيع نوتة تليفونات شبيسوي .. يرد يكتب نوتة يديدة وريله فوق رقبته، لأن محد بيسلفه نوته.

منو يذكر دليل الهاتف مال وزارة المواصلات؟

قبل الناس بسيطة الاسم يطلع مع رقم التليفون والعنوان .. بتعرف وين بيت أي وحدة تعرفها بس طلع اسم أبوها وركّب الاحتمالات .. ولا صار الاسم متشابه أخذ احتمالات من الجهره لي راس الزور، وعاد كل ما تمر يم أسم وعنوان تربط شكل البنية بالعنوان، لا ما ظنتي يمشي عليها سكان كيفان .. لا ويها ما يعطي على بنات الضاحية .. والله يمكن الروضة .. أي معقولة الروضة .. ها؟ أي لا أكيد الروضة، تالي تطلع البنت من سكان الرابية.

وبعدين طلع التليفون الوزاري، أظن تدق على البدالة تطلب خط، وبعدين تدق الرقم، وكان في تليفونات ما فيها أرقام بس دقم، وانتشرت ظاهرة الأرايل على السيارات، وبعدين انطلق واحد، تليفون يجربك تقعد، تروح الخيران تأجر قاري بو أربعة وتحطه بالسلة جدام، لأنه أهم من المسجل تقز بالبر تحطه بالصندوق اللي يمك لأن السيكل يصير مثل مال الجيش الألماني .. أكو بالدنيا سيكل قمارة ونص؟

وبعدين موديل انطلق أربعة ثابت نقال، وهات العدة وشيل العدة والجهاز بالدبة والسماعة يم القير، وشيل السماعة واشبك السماعة، وبعدين اشبك انطلق ستة على أربعة يصير ثابت نقال، والأريل بالديوانية يم الجامة، وفجأة صار في جي اس ام، شلون تبدل التليفون وما تغير الخط، وبعدين إيزي، شلون تدقع قبل لا تتكلم، زين إذا خلصت الفلوس وأنت تتكلم يفصل يعني.. فشلة. ودز لي كرت إيزي، أما التليفونات فأول شي أريكسون شكله دنابل صغار بنادي فليكس، تالي الكاتل حتى بالسرداب ما يفصل، وبعدين الأمين، وهات الاسكنر يا صبي، وأخمر بالسيارة يم الكلية.

كل هذا ورح .. أرقام رايحة وأرقام رادة، وبدّل بهالأرقام، ومن رحم الأحداث تولد قصة حب، شدعوة بنت عمي عطينا ويه، ما تعطيه ويه فيرد عليها زين هاج أخذي الرقم، الحين بنت عمك ما عطتك ويه ترد عليك، تبيها ما ترد عليك وتاخذ الرقم، وبعدين تقوم تلزم .. شدعوة عاد؟ فالبنت لأنها تبي الفكة وبترد حق أهلها عقب ما شرت نفيش من الريال اللي يوقف عند الجزيرة الخضرا فتقوم عن طيب خاطر تاخذ الرقم .. يرد يطحن: عاد دقي مو ما تدقين؟! .. وتالي يسأل نفسه عقب ما ينام يم التليفون والبنت ما دقت .. يصرخ على أمه من قمة راسه يوماااااااااااااااااااااااااااااااااااااااااااااااااااااااع محد دق وسأل عن سيف .. مع العلم إن أسمه فهد، ترد الأم: لا ما ظنتي، من وين لنا سيف، فيرد يصرخ على أمه من قمة راسه أيضا يوماااااااااااااااااااااااااااااااااااااااااااااااااااع قولي حق رفيجاتج لا أحد يدق اليوم ترى ناطر تليفون.

ما شاء الله عليك من صغرتك تطحن، ترقم وحدة وأنت بالتطبيقي وتسأل ليش ما دقت، وبعدين تروح تبيع صوتك وتمجل حق الصيف وإلا تدزه شرق آسيا .. عشتوا ماجلان رايح شرق آسيا قول تايلند وخلص، يرد يطحن على نفسه لأن ماكو أحد ثاني يطحن عليه .. يا ترى ليش ما دقت؟، يكبر .. يشتغل .. يعرف كتيبة من البنات .. يتزوج .. مع أول ولد الناس تدق عليه تبارك .. يظل السؤال معلق في باله بانتظار إجابته: ليش ما دقت؟، وفجأة عقب 15 سنة يقرر يطوي الصفحة ويغير رقم تليفونه، أول شي يخلي التليفون القديم شغال، بعدين يحوله على اليديد، وبعدين مس يو ويطفيه .. بس يشغله كل يوم بالليل، وقبل ما يلغي الخط، تقوم عذاري تنظف كبتها وتطيح التنورة الجينز .. وتصفن عليها، والله كنت ضعيفة قبل، شضعفي لأنها الحين طبعا صارت بعرض الكبت اللي طلعت منه التنورة، وفجأة تطيح ورقة معفسة ومسفطة مكتوب عليها سيف وتحته رقم تليفون منقوش نقش، تقول صاحبه خطاط، تتذكر متى خذت الرقم، تتذكر إنها قبل 15 سنة ونص خذت رقم واحد بالجزيرة الخضرا، تروح تطلّع لها خط يديد بدون بيانات.

تقوم عذاري تدق على رقم سيف، يطلع لها واحد .. تسكت .. تصكه بويهه، يرد يدق عليها .. تنبرص، يا غبية يا داثرة أكيد بيرد يدق عليج لأن عنده كاشف، تنصدم تسأله أنت سيف؟ .. يقول لها بييييييييييييييييييييييييييييييييييييييييييييييييييييييييييييييه توج تذكرين إن في واحد اسمه سيف ناطر طول هالسنين على أحر من النار إن وحدة حلوة لابسة تنورة جينز خذت رقمه يم راعي النفيش، ومن يومها ناطرها تدق وتوها تدق الحين، ترد تقول له: شنو اسمك الصجي؟، يرد عليها فهد، بس على فكرة ترى غيرت رقمي، أخذي رقمي اليديد، تاخذه ويسولف معها وبعدين فجأة تنخطب وتغير رقمها، ويتم سيف ينطرها تدق ويسأل نفسه: يوم إنها خذت الرقم ودقت عقب 15 سنة ليش سحبت علي مرة وحدة؟!