خالي قوة خالي

قلت ببطل سياسة وحبأه إنسان جديد .. وهييييييييييييييييييييه، قلت أنا اعتزلت الغرام وبدوره مغازل وتحرش ومواضيع لايت نخفف فيها عن الناس، بس وين يا خلاف يهدونك بحالك، شكيت حق البرك قلت له أبي أعيش على الهامش رد علي وين الهامش والجماعة يهدون المتن ويسكنون عندك، قلت ماني محارش أحد ولا أبي الرئيس يرحل، ومو يايز لي جماعة المعارضين الجدد، بلعت موس وهم ما فاد.

خلاص الحين حديتونا على الشر، نائب يطلع بفرعية مع نائب استخف على كبر يبي الكرسي ومعبوتش صاحب الحنجرة الذهبية، وفوقهم مملوح قابض الشيك اللي قال ما قبضت تالي قال قبضت، والأخ اللي يحوس الدنيا وتاعلوا لحقوا علي يا الرييال، ونواب ولبهم يلحقون بالبكيني مع العلم إن الحين دخل علينا اشتا، وزيد عليهم نواب ومناصرين من هالنمونة، صديت وبلعت الموس وقلت مالي شغل فيهم نارهم تاكل حطبهم وعساهم على هالحال وأردى.

الحين عقب كل هذا تبون تطقونهم وما تبونهم يتكلمون وتبوني أسكت ما عوزكم، لا بتكلم وبقول الصج لو على قص رقبتي، مواجهة الكلمة بالعنف ما تجوز، مع محمد الجويهل وإلا وليد الطبطبائي، تسكير الديوانيات بدون قانون ما يصير، تسمعون كلام وتفسرونه على كيفكم مو مقبول أبد.

كنت ضد حملة "ارحل .. الكويت تستحق الأفضل"، لكن اليوم مقتنع إن الكويت تستحق الأفضل، تسببت على كاتب وحبست سياسي لأنهم قالوا عنك كلام ما ياز لك، بلعتها وقلت القضاء ولا راد لحكم الله وقضائه، طبقت مع ناس مو أوادم، قلت كيفك إنت وياهم تنيازون، لكن توصل اليوم لحد التعدي على النواب وامتهان كرامات الناس لا عاد حدك .. الكويتيين أحرار بوجودك وعدمه، وكلمة الحق تنقال على قص أرقابهم، وإذا أمس كنا نختلف معاهم فتأكد إن بفضل رئاستك الرشيدة بنوقف اليوم وراهم.

أستاذ جامعي ينسحل تقولون تطبيق القانون، أي قانون يخولكم مواجهة الكلمة بالقوة، نائب محترم يصوتون له 10000 ناخب تمدونه بمطاعات بأمر منو هالكلام، تبون تقصون على العالم؟، جاهل ينطق عند باب ديوانية ينزل فيه مجلس الوزراء بيان استنكار وقوى الأمن تسحل دكتور جامعة وتتعدي بالضرب على نواب يصير تطبيق قانون، وين قاعدين؟!

آخر كلامي لك أنا بسألك من غير أطباعك منهو بدلك؟

وصدقني لو مو تنزلون القوات الخاصة .. لو تستعينون بقوات التحالف والنيتو .. محنا مبطلين سياسة ولا راح نتخلى عن الدستور .. والنواب على خمالهم نبيهم .. وموتوا حرة، واللي مو عاجبه بسبة اللي صار بصوت الانتخابات الياية حق السعدون والمسلم والطبطبائي وأسيل.

ونصيحتي للأخ "آي فور أربعة" قلوبنا تتعذرك، وترى الكويت صج تستاهل أحسن منك، وصدقني منت أعز عندنا من قحطة خال حسينوه لما طقه لأنه بيفسفس بالحلال (الدقيقة 3:20) لأن صج شلاقي بنفسك على بو خالنا؟ .. والحين فك نفسك من الرييال.