استايلي استايلك واستايلك استايلي

الحياة حلوة، والجو أكثر من رائع، يبيله سيجار واستكانة جاي، إي صج لحظة نسيت، عندي إيميل بدزه مالي خلق اللي ناطره يتعسر علي.

وين الـ send

كاهي .. يلا ناك إذلف إنت وإيميلك

حلاته بدال send يحطون طس وإلا ولي

شحاطين الوطن؟

أوه نسيت أنا أقول شعندي .. وراي بوست

إي كاني

إنشا الله ما ترد علي على طول .. شدعوة الحبيب من سكان جي ميل، بيتكم فوق الان بوكس ودارك تطل على الدرافت.

إي داز لك عقد إقراه بالاتاشمنت .. ما أحب اللي يستهبلون .. لا تحط لي أحمر بالتعديل لا يكون مدرس حضرتك .. أقصاك مال صحي .. ما سوت علينا صنية دش بنبدلها.

إنقلع.

أحد يبي شاي أخضر؟

يا أخي الوقت بسرعة يمشي، فجأة وصلنا الصفحة الثانية من الورد.

الشاهد .. على طرية الشاهد بقشوا رئيس تحريرها فقير .. راح ينفذ الحكم معاه سيجار، شيخ لورد، شكله السجن الحين غبط كبارات رجال الكويت .. سلمان الشملان على الشيخ صباح المحمد على محمد عبدالقادر على عبيد الوسمي .. صار اللي نعرفهم برة السجن أقل من اللي دشوه .. إيييييييييييييييييييييييييييييه ما علينا السجن تهذيب وإصلاح.

مشكلة لما تكون عايش بين مجتمعين، الأول هيلقي أحيانا يصير ستايل والثاني ستايل أحيانا يصير هيلقي، المشكلة ما تعرف شلون تتعامل مع الطرفين، تهلق مع الستايل مو شي واستايلك استايلي مع الهيلق ما تركب.

بنات الستايل غير .. يردون الروح، تحس وإنت تكلمها لازم تمسك شوكة وسجين وبمخباتك نتيجة التوفل وبدرج المكتب قبول أمريكا، ولازم الكلام يكون بالهاند فري، الهيلق عادي مشي معاهم نظام هااااااااااااااااااااااااااااا علي صوتج، وهي تعلي ما تدري إن المشكلة مو بالصوت المشكلة بمخارج الحروف.

الستايل لا قالت لك هاي كيفك سافا .. وين تلقى وحدة هيلقية تقول هاي كيفك سافا، تقول قوة .. شدعوة بنية تقول قوة .. داشة مخرطة بتعديلن رنق التاير، الستايل تقول أي ويل كول يو باك .. الهيلقية تقول دق علي، شوف الفرق .. هذيج تقول أنا بدق بينما الأخت تقول دق علي .. هذه النقطة المفصلية بالعلاقة.

الهيلقية تشتري من سناء والمحاميد وساعات تسألها من وين هالنفنوف ترد والله شريته من كارفور الأفنيوز .. يكون كارفور عنده 30 فرع مطشرين بالديرة، الثانية غير البرادا برادا والديور ديور، وأحيانا لما تهلق تشتري من سناء، لاحظ الفرق أيضا، الاستثناء عند الستايل سناء بينما الأصل عند الأخت سناء.

أكو أحد ياكل صمونة معكرونيا، تسأل أهل الستايل يقولون ما نعرف شي اسمه باستا ساندوتش، ترد على الأخت تقولها سامعة عن باستا ساندوتش تقول ما أعرفها أعرف صمونة معكرونيا (وتفت جبدك لا دقت على العين اللي بنص المعكرونيا) تقول لك حلاته عقب اللسانات، ولا وتدور ريل، وتتشره على الكويتيين اللي يتزوجون أجنبيات، أكو أحد يتزوج يارح .. لسانات يا الظالمة.. أزمة هوية عندج .. إنت بنت تاكلين لسانات، شصاير بالدنيا؟

بحكم خبرتي المتواضعة في عالم النساء دائما تواجهني مشكلة، البنت من تفتح بالسوالف ماكو كنترول .. تفتلت وكله جزء من الموضوع يرتبط بالدورة الشهرية، زين آمنا بالله، بيولوجيا في شي، بأمريكا البنت لما تبلغ يسون لها حفلة، أنا هني بالكويت شكو أعرف .. لا وأخذ النغزات اللي مالها والي .. أسبوع المرور .. أسبوع السحب والإضافة .. أنا هالأسبوع أعصابي شادة .. بطني يعورني .. يايتني الدورة .. والأمصخ علي العادة .. أيه الأرف ده الله يأرفك .. وأنا مالي، ده الملافظ سعد، تقول حق وحدة وين بتروحين اليوم ترد عليك ما لي خلق أطلع علي العادة .. شنو بتكون ردة فعلك .. كيك باند هذا أول شي .. وتالي كنترول ألت ديليت على طول .. الستايل غير، صج نفس المبدأ بس الأسلوب يفرق، يا آم بي أم أسينغ أو آي قوت ماي بيريود .. أو كلش كلش آم سك وأفل الموضوع على كده، طبعا لأنها ستايل وتكلم ماك تشيكن ما راح تشرح وايد وأهو ما راح يستلوح ودقق بزيادة، ولا اهي راح تعرف المعرف أو تسيس العمل السياسي، لكن في استثناءات لما تكون اهي موظفة كاونتر بالوطني والصاحب بالقوات الخاصة أو المطافي .. يصير في فرق بالرام والفريجن يحتاج يكون كومباتبل.

وحدة تداوم موظفة كاونتر بالوطني وإلا الأهلي أو الخليج رفيجها يداوم بالمطافي شلون بيكوزن الحوار بينهم؟ تقول له وإهي طالعة من الدوام: حبيبي اليوم ياني عميل يلوع الجبد، يرد عليها الصاحب عاد تصدقين اليوم قبل ما أسري من الدوام (لاحظ إنه استخدم كلمة أسري من الدوام) استدعوا مركزنا مع كل المراكز الثانية حق حريجة بأمغرا، أمغرا يقولها بالألف حتى مو مكلف على نفسه يخلها بالتاء المربطة، وهي ترد تسأله حبيبي أمغرا هذه وينها عن الداحيا، يرد عليها بالضبط يم داحية سعد العبدالله.

موظفة بإدارة عمل العاصمة بالشؤون ما يصير تكلم جراح أعصاب، بس موظفة خدمة كبار عملاء بشركة عادي تماشي عسكري بالمطافي، مع العلم بأن المطافي مو عسكريين.

يلا باي باي أمي دشت علي .. أحاجيكم بعدين.